Opnunarhátíð Mjölnis fór fram í dag þar sem nýja aðstaða félagsins var formlega opnuð í Öskjuhlíðinni. Jón Viðar Arnþórsson, forseti Mjölnis, var að vonum ánægður á opnuninni.
Það hefur verið unnið hörðum höndum í framkvæmdum hússins undanfarna mánuði. Í dag var aðstaðan opnuð og er svo sannarlega í heimsklassa.
Jón Viðar segir þetta vera ólýsanlega tilfinningu að vera að opna höllina enda tveggja ára vinna að baki. Í nýju aðstöðunni verða fjórir æfingasalir, rakarastofa, nuddstofa, bar og verslun. Æfingar samkvæmt stundaskrá hefjast á mánudaginn en þó á eftir að klára eitt og annað í húsinu.
Mikill fjöldi var mættur á opnunina í dag og fólk á öllum aldri. Gunnar Nelson og Sunna Rannveig árituðu myndir og sátu fyrir myndum. Að sögn Jóns Viðars er ekki ákveðið hvernig æfingabúðum Gunnars fyrir næsta bardaga verður háttað en Gunnar mætir Alan Jouban þann 18. mars í London.
