Luka Jelčić er króatískur bardagamaður sem æft hefur hér á landi undanfarnar vikur. Luka er hér að hjálpa Gunnari Nelson fyrir undirbúninginn fyrir bardaga hans gegn Santiago Ponzinibbio þann 16. júlí.
Luka Jelčić (10-2) æfir að öllu jöfnu hjá SBG í Dublin undir handleiðslu John Kavanagh. Þetta er í annað sinn sem Luka kemur hingað til lands og er hann yfir sig hrifinn af landi og þjóð.
Luka er léttvigtarmeistari FFC bardagasamtakanna í Króatíu en efnahagsástandið er slæmt þar í landi og ákvað hann því að flytja til Írlands. Luka hefur einnig dvalið í Bandaríkjunum við æfingar en hann bjó hjá Diaz bræðrunum Nick og Nate í tvo mánuði.
Luka segir að Gunnar sé í frábæru formi og sé tilbúinn fyrir bardagann gegn Santiago Ponzinibbio. Hann er ekki í nokkrum vafa um að Gunnar klári Santiago enda sýni tölfræðin það að Gunnar klárar bardaga sína.
