3

Mánudagshugleiðingar eftir UFC Fight Night: Nelson vs. Story

Mynd: Kjartan Páll Sæmundsson.

Mynd: Kjartan Páll Sæmundsson.

Nú þegar tveir dagar eru liðnir frá UFC bardagakvöldinu í Stokkhólmi er vert að líta til baka. Gunnar Nelson tapaði sínum fyrsta MMA bardaga á ferlinum og var bardaginn ómetanleg reynsla fyrir kappann.

Það var alltaf vitað að Rick Story yrði erfiður andstæðingur en þrátt fyrir það var Gunnar mun sigurstranglegri hjá veðbönkum og spáðu flestir sérfræðingar Gunnari sigri. Gunnar byrjaði bardagann mjög vel og náði glæsilegri fellu í 1. lotu og sigraði þá lotu að flestra mati. Rick Story gerði vel í að standa upp eftir felluna og augljóst að hann vildi alls ekki vera í gólfinu með Gunnari. Eftir að Gunnar náði fellunni úr “clinchinu” reyndi Story að forðast þá stöðu og gekk það ágætlega eftir. Þegar leið á bardagann virtist Story taka yfir bardagann þó jafn hafi verið.

Story náði að kýla Gunnar niður í 4. lotu og fylgdi því eftir með höggum í gólfinu en Gunnar var fljótur að jafna sig. Þegar Story sá að Gunnar var búinn að jafna sig lét hann Gunnar standa upp og aftur sýndi hann engan áhuga á að fara í gólfið með Gunnari. Story vann heimavinnuna sína vel og virtist ekkert ætla að þreytast.

Mynd: Kjartan Páll Sæmundsson.

Mynd: Kjartan Páll Sæmundsson.

Báðir bardagamenn náðu góðum höggum inn í bardaganum og sást eftir bardagann að Story var vel bólginn í andlitinu. Gunnar fékk skurð á nefið eftir að höfuð þeirra skullu saman og var bólginn í lærinu eftir lágspörk Story en leið annars ágætlega líkamlega eftir bardagann. Story var mjög bólginn í andlitinu eftir bardagann og átti sennilega erfitt með að sjá vegna bólgu í gær.

Þetta var 25 mínútna orrusta og ómetanleg reynsla að fara í gegnum svona hörku. Gunnar sýndi sterkan hug og hjarta í að halda áfram eftir að hafa verið kýldur niður og það er eitthvað sem ekki er hægt að kenna. Gunnar og lið hans eiga vafalaust eftir að læra helling af þessum bardaga og koma enn betri til leiks næst.

Allir tapa einhvern tíman og flestir af þeim bestu í UFC hafa tapað. Pressan sem fylgir því að vera ósigraður er farin og hafa flestir bardagamenn lært gríðarlega margt af fyrsta tapinu sínu. Gunnar mun nú taka sér smá frí frá keppni og berst næst á næsta ári. Á blaðamannafundinum eftir bardagann kom fram að næsta bardagakvöld UFC í Evrópu verði í febrúar/mars í London og gætum við fengið að sjá Gunnar þar næst.

Pétur Marinó Jónsson
Latest posts by Pétur Marinó Jónsson (see all)

Pétur Marinó Jónsson

Eigandi og ritstjóri vefsins www.mmafrettir.is -Æft bardagaíþróttir í einhver ár (fjólublátt belti í BJJ) -BS í sálfræði -Lýsi UFC á Viaplay

3 Comments

Leave a Reply

This site uses Akismet to reduce spam. Learn how your comment data is processed.