Aðalbardaginn á UFC 240 er staðfestur þar sem þeir Max Holloway og Frankie Edgar hafa báðir náð tilsettri þyngd.
Formlega vigtunin fyrir UFC 240 fer fram um þessar mundir í Kanada. Þeir Edgar og Holloway voru nokkuð snemma mættir í vigtunina og voru báðir 145 pund (65,7 kg) slétt fyrir titilbardaga þeirra í fjaðurvigt.
Max Holloway þurfti hins vegar handklæðið til að ná 145 pundunum. Holloway barðist síðast í léttvigt og viðurkennir að niðurskurðurinn í fjaðurvigtina sé síður en svo auðveldur fyrir sig.
Alexander Volkanovski var staðgengill ef ske kynni að Edgar eða Holloway myndu ekki ná vigt. Volkanovski þurfti því að vigta sig inn í dag og var 144,5 pund.
Þær Cris ‘Cyborg’ Justino og Felicia Spencer voru einnig í tilsettri þyngd fyrir bardaga þeirra en allir bardagamenn morgundagsins náðu vigt. Formlega vigtunin klárast kl. 17:00 á íslenskum tíma en sjónvarpsvigtunin er svo á dagskrá kl. 22:00 í kvöld.
