Miðasala á fyrsta UFC bardagakvöldið í London í þrjú ár hefst í vikunni. Forsala hefst á miðvikudaginn en almenn miðasala á föstudaginn.
Gunnar Nelson mætir Claudio Silva á UFC bardagakvöldinu í London þann 19. mars. Þetta verður fyrsti bardagi Gunnars síðan í september 2019.
Bardagakvöldið fer fram í O2 Arena í London en UFC hefur árlega heimsótt London ef undanskilin eru 2020 og 2021 vegna kórónuveirunnar. Síðast þegar UFC hélt bardagakvöld í London barðist Gunnar Nelson við Leon Edwards í sömu höll.
Það verður því mikil eftirspurn eftir miðum á kvöldið en þetta verður jafnframt fyrsta heimsókn UFC til Evrópu síðan UFC hélt bardagakvöld í Moskvu í nóvember 2019. Bardagakvöldið er nú þegar hlaðið af vinsælum bardagamönnum frá Evrópu á borð við Paddy Pimblett, Tom Aspinall, Arnold Allen og auðvitað Gunnar Nelson.
Miðasala hefst í vikunni og eru tvennar forsölur áður en almenn miðasala hefst:
2. febrúar: UFC Fight Club forsala
Fyrsti séns að ná sér í miða er í gegnum UFC Fight Club forsöluna á miðvikudaginn. Forsalan hefst kl. 9:00 á íslenskum tíma. Aðild að klúbbnum kostar 85 dollara (10.900 ISK) á ári og er forsalan í sólarhring. Auk þess fá meðlimir klúbbsins bol, bréf frá Dana White og aðgang að spjallborði. Hver meðlimur getur að hámarki keypt 6 miða og er eitthvað takmark af miðum í boði svo það verði ekki allt uppselt þegar almenna miðasalan hefst.
3. febrúar: UFC newsletter forsala
Þessi forsala kostar ekkert og hefst kl. 10:00 á fimmtudaginn. Hægt er að gerast áskrifandi af fréttabréfi UFC hér og fá áskrifendur kóða til að nota í forsöluna í sólarhring. Líkt og í Fight Club forsölunni er eitthvað takmark af miðum í boði svo það verði ekki allt uppselt þegar almenna miðasalan hefst og er aðeins hægt að kaupa að hámarki 6 miða í einu.
4. febrúar: Almenn miðala
Almenn miðasala hefst föstudaginn 4. febrúar kl. 10:00 á íslenskum tíma. Á síðustu árum hefur verið uppselt aðeins 30 mínútum eftir að almenna miðasalan hefst og má búast við svipuðum æsingi í ár. Það þarf því að hafa hraðar hendur til að næla sér í miða.
Miðaverð á viðburðinn hefur ekki verið opinberað en ódýrustu miðarnir verða sennilega í kringum 50 pund.
