Mike Perry sigraði Jake Ellenberger í gær á UFC bardagakvöldinu í Nashville í gærkvöldi. Í viðtalinu eftir bardagann hálfpartinn óskaði hann eftir bardaga gegn Gunnari Nelson.
Mike Perry sigraði Ellenberger með rothöggi í 2. lotu eftir olnboga. Þetta var tíundi sigur Perry á ferlinum en allir eru þeir eftir rothögg.
Í viðtalinu í búrinu eftir bardagann spurði Perry áhorfendur hvaða líf hann ætti að eyðileggja næst. Brian Stann fylgdi því eftir og spurði hvort hann væri með einhvern ákveðin andstæðing í huga.
„Hvern sem er. Klifrum upp styrkleikalistann, við erum á leiðinni upp,“ sagði Perry.
Jake Ellenberger er sem stendur í 13. sæti styrkleikalistans og vill Perry einhvern sem er ofar á listanum. „Þetta var númer 13. Hver vann minn síðasta andstæðing? Mér er sama. Náum honum. Hver sem er.“
Maðurinn sem vann hans síðasta andstæðing (fyrir Ellenberger bardagann) er auðvitað okkar maður, Gunnar Nelson. Fyrir bardagann gegn Ellenberger tapaði Perry fyrir Alan Jouban en Gunnar Nelson vann auðvitað Jouban í mars.
