Bardagafélagið Mjölnir mun opna útibú í Vestmannaeyjum. Þetta staðfestir Jón Viðar Arnþórsson í samtali við MMA Fréttir.
Mjölnir er um þessar mundir staðsett á Seljavegi 2 í gamla Loftkastalanum. Félagið mun þó flytja í Öskjuhlíðina þar sem Keiluhöllin var áður til húsa. Nú mun Mjölnir hins vegar opna annað útibú í fyrsta sinn.
„Við stefnum á að opna í júní sumar,“ segir Jón Viðar Arnþórsson, forseti Mjölnis. Eins og kom fram í frétt Morgunblaðsins í dag mun Mjölnir verða staðsett í húsnæði gamla Ísfélagsins í Eyjum.
„Húsnæðið er mjög stórt, 350-380 fm salur og svo klefar. Það þarf ekki að gera mikið fyrir húsnæðið ef við fáum það. Bara aðeins að mála og merkja.“
Ekkert er um bardagaíþróttir í Vestamannaeyjum eins og er en það mun breytast í sumar. „Til að byrja með verður þetta aðallega glíman og Víkingaþrek. Við munum koma til með að senda þjálfara þangað um helgar, einu sinni til tvisvar í mánuði, en annars þjálfa upp þjálfara. Svo eru nokkrir Mjölnismenn sem eru úr Eyjum og flakka mikið á milli sem munu koma til með að þjálfa þarna og margir sem vilja hjálpa til,“ segir Jón Viðar að lokum.
JÁÁÁ!!:)))