Albert Tumenov hefur gert það gott síðan hann ákvað að yfirgefa UFC. Tumenov nældi sér í sinn fimmta sigur í röð í gær og það með rothöggi.
Albert Tumenov mætti Gunnari Nelson árið 2016. Tumenov var þá á topp 15 á styrkleikalista UFC, efnilegur bardagamaður í veltivigtinni og sigurstranglegri hjá veðbönkum.
Gunnar Nelson sigraði með hengingu í 2. lotu en fram að tapinu var Tumenov á fimm bardaga sigurgöngu. Tumenov mætti síðan Leon Edwards eftir það og tapaði aftur eftir hengingu.
Þegar samningnum hans við UFC lauk ákvað hann að söðla um í stað þess að semja aftur við UFC. Tumenov hefur verið að gera það gott síðan þá og unnið fimm bardaga í röð hjá ACB og ACA í Rússlandi og Kasakstan.
Tumenov mætti Beslan Ushukov á ACA 102 í gærkvöldi. Tumenov sigraði með rothöggi í 2. lotu.
Tumenov er ríkjandi veltivigtarmeistari ACA og hefur unnið þrjá af síðustu fimm bardögum sínum með rothöggi.
