Anthony Johnson og Daniel Cormier mætast á UFC 206 í desember. Kapparnir voru í sjónvarpsþætti í Kanada á dögunum og greindi þáttastjórnandinn óvart frá litlu leyndarmáli í miðju viðtali.
UFC 206 fer fram þann 10. desember í Torondo, Kanada. Í vikunni voru þeir í viðtölum til að kynna bardagakvöldið og mættu meðal annars í þáttinn Breakfest Television.
Þáttastjórnandinn Dina Pugliese sagði þá óvart frá hnémeiðslum Daniel Cormier. Meistarinn virðist eiga við hnémeiðsli að stríða og er það nokkuð sem ekki var vitað um.
„Ég hafði ekki hugmynd um þetta en takk fyrir að láta mig vita,“ sagði Johnson er hann sat við hliðina á Cormier í viðtalinu.
Cormier hristi á hausinn og var ekki ánægður með opinberun á þessu litla leyndarmáli Cormier.
