Fyrsti andstæðingur Rory MacDonald í Bellator verður Paul Daley. Kapparnir munu mætast í aðalbardaganum á Bellator 179 í London þann 19. maí.
Rory MacDonald samdi við Bellator í ágúst í fyrra. Þegar hann fór úr UFC var hann einn af bestu veltivigtarmönnum bardagasamtakanna og er þetta mikill fengur fyrir Bellator. Hann hefur þó tapað tveimur bardögum í röð og þarf að komast aftur á sigurbraut.
MacDonald hefur verið í vandræðum með nefið á sér síðan hann nefbrotnaði í bardaganum gegn Robbie Lawler á UFC 189 í júlí 2015. Í bardaga hans gegn Stephen Thompson í júní í fyrra var nefið hans aftur ansi lemstrað og vildi hann taka sér gott frí eftir það til að leyfa nefinu að jafna sig.
Hann er nú tilbúinn til að snúa aftur og mætir Paul Daley í maí. Daley var orðaður við bardaga gegn Michael Page en vildi frekar mæta MacDonald. Page verður þó sennilega á bardagakvöldinu og fær vonandi verðugan andstæðing.
Paul Daley sigraði Brennan Ward nýlega með rosalegu hnésparki.
https://www.youtube.com/watch?v=4vH9xnrbjb4
Bardagakvöldið fer fram í SSE Arena í London og er MacDonald spenntur fyrir næsta kafla ferilsins.
