Reykjavík MMA var með tvo keppendur á Evolution of Combat 6 bardagakvöldinu í Skotlandi í gær. Niðurstaðan var einn sigur og eitt tap.
Þeir Krzysztof Porowski og Remek Duda Maríusson börðust á kvöldinu en báðir voru að berjast áhugamannabardaga. Remek mætti Shaun Conway í 69 kg hentivigt en báðir voru að berjast sína fyrstu MMA bardaga. Remek tapaði eftir dómaraákvörðun en andstæðingurinn náði að taka Remek niður nokkrum sinnum sem skilaði honum sigrinum.
Krzysztof mætti Jeff Akhah í 76 kg hentivigt. Þeir skiptust á höggum í 1. lotu en Akhah náði svakalegri fellu í fyrstu lotu. Í 2. lotu náði Krzysztof taki á hálsinum á Akhah, lét sig falla í gólfið og kláraði með „guillotine“ hengingu. Flottur sigur hjá Krzysztof en hann er nú 3-0 sem áhugamaður í MMA.
