Rétt í þessu var UFC hér í Dublin að ljúka. Í aðalbardaganum mættust þeir Conor McGregor og Diego Brandao. McGregor stóð uppi sem sigurvegari eftir tæknilegt rothögg í fyrstu lotu.
Þvílík læti þegar Conor McGregor gekk inn í salinn! Annað eins hefur aldrei heyrst! Conor virtist sjálfur þó vera yfirvegaður og slakur yfir þessu öllu saman. Conor McGregor byrjaði bardagann vel og virtist hitta Brandao með snúningssparki strax í upphafi bardagans. Diego Brandao pressaði Conor upp við búrið og reyndi að ná honum niður en Conor náði að snúa taflinu við og pressaði hann upp við búrið. Brandao fór í fellu en Conor náði fallegu kasti og endaði ofan á. Conor raðaði inn nokkrum höggum á Brandao sem sótti í fótalása en Conor varðist vel. Þeir stóðu upp og þá byrjaði Conor að hitta Brandao vel. Conor virtist hitta Brandao vel með skrokkhöggi og fylgdi svo eftir með beinni hægri stuttu seinna. Brandao féll niður og Conor létt höggin dynja á honum í gólfinu áður en dómarinn stöðvaði bardagann. Frábær frammistaða hjá heimamanninum sem lét pressuna ekki hafa nein áhrif á sig.
