Bardaga Gunnars Nelson og Zak Cummings var að ljúka þar sem Gunnar sigraði eftir uppgjafartak í 2. lotu.
Zak Cummings gekk inn afslappaður undir einhverju bandarísku rokki á meðan Gunnar gekk inn undir sínu hefðbundna “Leiðin okkar allra” með Hjálmum. Bardaginn byrjaði mjög rólega og fremur lítið gerðist í fyrstu lotu. Zak Cummings reyndi fellur og þrýsti Gunnari upp við búrið en Gunnar virtist ekki hafa miklar áhyggjur af því og var afslappaður á meðan hann varðist. Önnur lota var eins og fyrsta, Zak Cummings reyndi að þrýsta Gunnari upp við búrið. Gunnar kom með beina hægri beint í andlit Cummings og aftur stuttu seinna. Við það virtist Gunnar hitna og var farinn að hreyfa sig vel, Cummings reyndi fellu en Gunnar náði taki á hálsi Cummings og dró hann þannig niður. Þegar í gólfið var komið var Gunnar fljótur að ná bakinu. Þar lét hann höggin dynja á honum áður en hann náði “rear naked choke”, lófa í lófa. Cummings neyddist til að tappa út og gafst upp. Gunnar Nelson sigrar eftir uppgjafartak í 2. lotu! Frábær frammistaða enn og aftur!
