Í fyrra tilkynnti bardagaklúbburinn Mjölnir að félagið ætlaði sér að flytja í gömlu Keiluhöllina í Öskjuhlíðinni. En hvað er að frétta af húsnæðisbreytingunni á þessari stundu?
Upphaflega var talið að flutningurinn færi fram á vormánuðum en nú þegar haustið er komið hefur lítið heyrst af flutningunum. Við heyrðum í Jóni Viðari Arnþórssyni, forseta Mjölnis, til að forvitnast um hvað hafi valdið þessum töfum?
„Það voru fjárfestar sem komu inn og bökkuðu út, aðrir sem komu inn og bökkuðu út og þannig gekk það fyrir sig í langan tíma. Það var erfitt að ná samningum og því gríðarleg töf,“ segir Jón Viðar.
Jón Viðar gat ekki gefið upp mikið að svo stöddu en býst við að málin skýrist fljótlega. „Það kemur í ljós á næstu dögum hvort við förum inn eða ekki. Það eru endalausir fundir í gangi og vonandi getum við tilkynnt eitthvað fljótlega.“
Engar framkvæmdir eru því byrjaðar í húsnæðinu en samkvæmt upphaflegum teikningum verða sex mismunandi salir í húsnæðinu.
Sá orðrómur hefur verið á kreiki að Conor McGregor ætli að fjárfesta í húsnæðinu en er einhver sannleikur í því? „Hann hefur ennþá áhuga á því og stefnir á að gera það. Það kemur í ljós á næstu vikum hversu mikið það verður,“ segir Jón Viðar að lokum.
