0

Af hverju er Gunnar ekki kominn með bardaga?

haraldur nelson

Mynd: Kjartan Páll Sæmundsson.

Núna eru tæpir tveir mánuðir síðan Gunnar Nelson sigraði Alan Jouban í London í mars. Síðan þá hefur lítið heyrst af næsta bardaga Gunnars og velta margir því fyrir sér af hverju hann sé ekki kominn með næsta bardaga.

Til þess að fá svar við þessari spurningu heyrðum við í föður og umboðsmanni Gunnars, Haraldi Dean Nelson. Af hverju er Gunnar ekki kominn með bardaga? „Af því að UFC hefur ekki boðið neinn bardaga en eru að leita að andstæðingi eftir því sem ég best veit,“ segir Haraldur.

Síðasti andstæðingur Gunnars, Alan Jouban, var ekki á styrkleikalista UFC. Upphaflega vildi Gunnar einhvern sem var ofarlega á styrkleikalistanum en enginn var laus á þeim tíma. Er Gunnar bara að leitast eftir að fá andstæðing sem er fyrir ofan hann á styrkleikalistanum í þetta sinn?

„Nei, við erum alls ekkert bara að horfa uppá við á styrkleikalistanum. Hins vegar var það auðvitað okkar fyrsti kostur á fá topp 5 mann, ekki síst þar sem Gunnar barðist síðast við mann sem var neðar en hann á lista og raunar ekki á topp 15 listanum. Það var líka áhugi fyrir því hjá UFC en því miður er það svo að allir sem eru fyrir ofan Gunnar á listanum eru annað hvort meiddir eða komnir með bardaga. Það var talsverð umræða varðandi Gunnar vs. Stephen Thompson en Thompson var í hnéaðgerð og verður að sögn ekki keppnisfær fyrr en í september. Neil Magny er einnig meiddur og sama sagan virðist vera með Carlos Condit en allir aðrir eru bókaðir.“

Mun Gunnar frekar bíða eftir topp andstæðingi í haust í stað þess að fá einhvern sem er neðar en hann í sumar?

„Nei alls ekki. Hins vegar er þetta pínu flókin staða. Ef Gunnar berst í sumar þá er alltaf hætta á því að þeir sem eru núna á meiðslalista verði komnir af honum í millitíðinni, þ.e. áður en Gunnar berst, og bókaðir í annan bardaga. Þá meina ég að þó þeir verði ekki tilbúnir að berjast fyrr en í haust þá séu þeir orðnir það góðir af meiðslunum að þeir séu tilbúnir að bóka sig í bardaga sem þeir eru núna ekki tilbúnir að gera. En það verður þá bara að hafa það, því ef Gunnar fær álitlegan bardaga í sumar þá mun hann taka hann. Hann vill berjast þrisvar á árinu sé slíkt boði.“

UFC er með bardagakvöld í Skotlandi í júlí og enn sem komið er hefur UFC ekki greint frá því hverjir verða í aðalbardaga kvöldsins. Hefur UFC reynt að koma Gunnari á bardagakvöldið í Skotlandi eða önnur bardagakvöld í sumar en bara vantað dansfélaga?

„Við erum að skoða þau mál núna með UFC og það ætti vonandi að skýrast á næstu dögum. Það er t.d. stutt í keppnina í Skotlandi, rúmar átta vikur, og því þyrfti að fara að ganga frá þeim bardaga ef hann á að verða að veruleika. Gunnar hefur áhuga á að keppa í Skotlandi og UFC veit það. UFC hefur einnig sagst líka vilja fá hann til Bandaríkjanna en ekki útilokað að hann keppi í Evrópu í sumar og þá er eiginlega bara um Skotland að ræða því næsta keppni í Evrópu þar á eftir er í Holland í byrjun september. Það kæmi hins vegar líka alveg til greina. Gunnar hefur einfaldlega mikinn áhuga á að berjast fyrir stuðningsmenn sína í Evrópu sem eru margir. En eins og ég sagði þá ætti þetta að skýrast á næstu dögum, og þarf að gera það, því stuttur tími er til stefnu,“ segir Haraldur að lokum.

Gunnar Nelson Alan Jouban

Mynd: Mjölnir/Sóllilja Baltasardóttir.

Pétur Marinó Jónsson

Pétur Marinó Jónsson

Eigandi og ritstjóri vefsins www.mmafrettir.is -Æft bardagaíþróttir í einhver ár (fjólublátt belti í BJJ) -BS í sálfræði -Lýsi UFC á Viaplay

Leave a Reply

This site uses Akismet to reduce spam. Learn how your comment data is processed.