Fleiri íslenskir bardagamenn voru að bætast við FightStar bardagakvöldið í desember. Þeir Bjarki Pétursson og Bjarki Ómarsson eru komnir með staðfesta bardaga.
Það verða hvorki meira né minna en þrír Bjarkar á FightStar 13 bardagakvöldinu þann 9. desember. Eins og áður hefur komið fram verður Bjarki Þór Pálsson í aðalbardaga kvöldsins en hann mætir Steve O’Keeffe en þetta verður fyrsta titilvörn Bjarka Þórs í FightStar.
Bjarki Ómarsson (7-4) er einnig kominn með bardaga en hann mætir Nathan Jessimer (6-2) í fjaðurvigt. Barist er um bráðabirgðarbeltið í fjaðurvigtinni en um áhugamannabardaga er að ræða. Bjarki hefur ekkert barist síðan í júlí 2016 en hann hefur átt í erfiðleikum með að fá andstæðinga og einnig glímt við meiðsli.
Bjarki Pétursson (1-1) mætir Jonas Leonard Grace (2-0) í millivigt. Bjarki barðist einnig á síðasta bardagakvöldi FightStar í október.
Þá er Ingþór Örn Validmarsson með staðfestan bardaga og stefnir því allt í að fjórir Íslendingar berjist á FightStar 13 þann 9. desember. Fleiri Íslendingar gætu bæst við á bardagakvöldið.
