Bardagi Conor McGregor og Rafael dos Anjos verður ekki á UFC 197 eins og upphaflega var ætlað. Bardaginn verður þess í stað á UFC 196 en mun engu að síður fara fram þann 5. mars.
UFC 196 átti að vera þann 6. febrúar en nú hefur bardagakvöldið verið endurnefnt UFC Fight Night og verður ekki „Pay per view“ kvöld heldur sýnt frítt á Fox Sports 1. Af þeim sökum mun UFC 197 verða að UFC 196.
Bardagakvöldið hefur tekið miklum breytingum á tæpri viku. Upphaflega átti aðalbardaginn að vera titilbardagi í þungavigt á milli Fabricio Werdum og Cain Velasquez og stefndi allt í spennandi bardagakvöld. Eftir meiðsli beggja bardagamanna verður aðalbardaginn fimm lotu bardagi milli Johny Hendricks og Stephen Thompson en upphaflega var bardaginn næstsíðasti bardagi kvöldsins. Þá verður aðalhluti bardagakvöldsins fjórir bardagar en ekki fimm eins og upphaflega var planað.
Þetta mun hafa í för með sér talsverðar breytingar á komandi númeruðu bardagakvöldum UFC (pay per view). UFC 200 á að fara fram í júlí í International Fight Week en það er einn af hápunktum ársins hjá UFC. Bardagasamtökin munu þó að öllum líkindum bæta við einu PPV bardagakvöldi í maí til að UFC 200 verði í júlí en ekki í ágúst.
Kannski mun plakatið fyrir UFC 196 verða öðruvísi en fyrir UFC 197 en Conor McGregor gagnrýndi umrætt plakat og sagði það ófrumlegt og leiðinlegt. Þetta gæti því verið kjörið tækifæri til að skella beltinu hans McGregor á plakatið og jafnvel gera eitthvað skemmtilegra en þessi hefðbundnu plaköt.
