Dana White, forseti UFC, var undrandi á tísti Conor McGregor frá því í morgun. Að hans sögn hefur hann hvorki talað við hann né umboðsmann hans síðan í síðustu viku.
Áfram heldur fléttan.
Eins og við greindum frá í morgun hélt Conor McGregor því fram á Twitter að hann muni berjast á UFC 200. Tíðindunum var tekið með fyrirvara enda hafði engin staðfesting komið frá UFC varðandi málið.
Í samtali við Los Angeles Times segir Dana White að Conor McGregor muni ekki berjast á UFC 200 þrátt fyrir yfirlýsingu Írans í morgun. „Við höfum ekkert talað við Conor eða umboðsmann hans síðan blaðamannafundurinn fór fram á föstudaginn. Ég veit ekki af hverju hann sagði þetta á Twitter.“
Conor McGregor átti að berjast við Nate Diaz á UFC 200 í júlí. McGregor vildi hins vegar ekki fljúga út til Bandaríkjanna til að taka þátt í kynningartúr fyrir bardagakvöldið og vildi þess í stað fá að æfa á Íslandi. Þar af leiðandi var hann tekinn af UFC 200 og mun hann ekki vera á bardagakvöldinu eins og staðan er nú.
