Gunnar Nelson er kominn á fullt skrið núna eftir meiðsli. Gunnar vonast eftir því að fá bardaga fljótlega.
Haraldur Dean Nelson, faðir og umboðsmaður Gunnars, segir í samtali við MMA Viking að Gunnar hafi jafnað sig á ökklameiðslunum og sé nú farinn að æfa á fullu. Gunnar varð fyrir ökklameiðslum í aðdraganda bardagans gegn Dong Hyun Kim í nóvember og neyddist til þess að draga sig úr bardaganum.
Haraldur segir að vonir standi til að Gunnar berjist í mars eða apríl þó enginn andstæðingur eða bardagakvöld sé í augsýn. Haraldur telur ólíklegt að Gunnar berjist á UFC bardagakvöldinu í London í mars.
Gunnar er eins og áður segir farinn að æfa en er einnig að taka virkan þátt í uppbyggingu á nýju Mjölnisaðstöðunni í Öskjuhlíð en stefnt er að opnun þann 18. febrúar.
