Inga Birna Ársælsdóttir úr Mjölni nældi sér í tvöfalt brons á Nordic BJJ Open um helgina í Stokkhólmi.
Inga Birna keppti í -58,5 kg flokki fjólublábeltinga í gær (laugardag). Þar tapaði hún fyrri glímunni sinni en vann bronsglímuna á dómaraúrskurði.
Í dag fóru svo opnu flokkarnir fram og þar náði Inga aftur bronsinu. Inga keppti þrjár glímur og var síðasta glíman sérlega spennandi. Inga var undir á stigum á móti mun stærri andstæðingi en náði að klára glímuna með „guillotine“ hengingu þegar skammt var eftir af glímunni. Með sigrinum nældi hún sér í bronsið og getur vel við unað eftir helgina.
Eiður Sigurðsson, einnig úr Mjölni, keppti í brúnbeltingaflokki í gær en komst ekki í verðlaunasæti. Hann gat ekki keppt í opna flokkinum í dag vegna meiðsla.
