Fyrrum strávigtarmeistarinn Joanna Jedrzejczyk er komin með sinn næsta bardaga. Joanna fær Tecia Torres næst en bardaginn fer fram í Kanada í sumar.
UFC ætlar greinilega að koma með sterkt bardagakvöld til Calgary í Kanada í sumar. Bardagakvöldið fer fram þann 28. júlí og hefur UFC þegar staðfest viðureign Jose Aldo og Jeremy Stephens.
Nú hefur UFC staðfest bardaga Joanna Jedrzejczyk og Tecia Torres á kvöldinu. Torres tapaði fyrir Jessica Andrade í febrúar en fram að því hafði hún unnið þrjá bardaga í röð. Torres er ein af fáum nálægt toppnum í strávigtinni sem hefur ekki ennþá mætt Jedrzejczyk. Þetta verður fyrsti bardagi Jedrzejczyk sem er ekki titilbardagi síðan í desember 2014.
Jedrzejczyk varði strávigtartitil sinn fimm sinnum í UFC en tapaði titlinum til Rose Namajunas í nóvember í fyrra. Þær mættust svo aftur í apríl en þá sigraði Namajunas eftir dómaraákvörðun.
Enn vantar aðalbardaga kvöldsins en UFC er að reyna að setja saman bardaga á milli Dustin Poirier og Eddie Alvarez. Alvarez neitar að berjast aftur fyrr en hann fær nýjan samning en Alvarez á einn bardaga eftir af núgildandi samningi. Þá reyndi UFC að fá fluguvigtarmeistara kvenna, Nicco Montano, til að mæta Valentinu Shevchenko en Montano er enn að glíma við meiðsli.
