Magnús ‘Loki’ Ingvarsson berst sinn fyrsta atvinnubardaga nú á laugardaginn. Magnús mætir þá Gav McGee á Caged Steel bardagakvöldinu í Doncaster.
Magnús var 7-3-1 sem áhugamaður í MMA en tekur nú sinn fyrsta atvinnubardaga. Magnús átti góðan feril sem áhugamaður og nældi sér meðal annars í brons á Evrópumótinu í MMA árið 2016.
Hans síðasti bardagi fór þó ekki sem skyldi en þar var hann rotaður snemma í 1. lotu. Í Leiðinni að búrinu segir Magnús frá síðasta bardaga en þetta var í fyrsta sinn sem hann hefur verið rotaður.
Andstæðingur hans á laugardaginn er 1-1 sem atvinnumaður og ætti að verða hörku viðureign. Bardaginn fer fram í léttvigt á laugardaginn en RVK MMA mun sýna beint frá bardaganum á Facebook síðu sinni.
