Mike Perry mætir Santiago Ponzinibbio annað kvöld á UFC bardagakvöldi í Kanada. Perry er meðvitaður um orðspor Ponzinibbio og augnpotin hans í síðasta bardaga.
Mike Perry horfði á síðasta bardaga Ponzinibbio þegar hann sigraði Gunnar Nelson í sumar.
„Hann vill kýla eins og grunnskólastelpa. Hann glennir út fingurna,“ sagði Perry og hermdi eftir með klórhreyfingum.
„Hann leit út fyrir að vera bókstaflega að reyna að troða puttunum sínum í augu fólks. Og svo reynir hann að troða hnúunum í augun. Ég fíla það, láttu reyna á það! Ef puttinn þinn ratar í kjaftinn minn gæti hann samt verið bitinn af.“
Perry segist einnig hafa reiknað með augnpotum á æfingum sínum en í þau skipti sem hann fékk putta í augað vildi hann halda áfram.
