Gunnar Nelson tapaði fyrir Santiago Ponzinibbio í gær eftir rothögg í 1. lotu. Á blaðamannafundinum eftir bardagann talaði Gunnar um að potað hefði verið í auga hans. Hér má sjá mynd af atvikinu.
Gunnar tók það þó fram að hann væri ekki að afsaka sig. Hann var aðallega ósáttur út í sjálfan sig fyrir að hafa ekki gert hlé á bardaganum eftir að potað hafði verið í augað á sér enda sá hann tvöfalt og gat því ekki skynjað fjarlægðina.
Bannað er auðvitað að pota í auga andstæðingsins en gerist alltof oft af slysförum í MMA. Gunnar hefði getað látið dómarann vita að potað hefði verið í auga hans og hefði þá dómarinn getað gert hlé á bardaganum til að leyfa Gunnari að jafna sig eftir þetta óviljaverk hjá Ponzinibbio.
Ljósmyndarinn Jerry McCarthy birti eftirfarandi myndir en þar sést þegar Gunnar fær putta í augað.
