Sjónvarpsvigtunin fyrir UFC 205 var að ljúka rétt í þessu. Allt fór friðsamlega fram og því ekkert nema stórslys sem getur komið í veg fyrir bardagana á morgun.
Alvöru vigtunin fór fram fyrr í dag þar sem Thiago Alves náði ekki vigt og Kelvin Gastelum reyndi einu sinni ekki.
Sjónvarpsvigtunin fór svo fram í Madison Square Garden í kvöld fyrir framan þúsundir áhorfenda. Gríðarleg stemning var í vigtuninni og var gaman að sjá bardagamennina vigta sig inn.
Eftir vigtunina frumsýndi UFC nýtt kynningarmyndband fyrir UFC 207 sem fer fram í lok desember. Þar mætast Ronda Rousey og Amanda Nunes í aðalbardaganum og mættu þær Ronda og Nunes á sviðinu augliti til auglits. Joe Rogan ætlaði greinilega að taka viðtal við þær báðar en Ronda gekk bara af sviðinu.
