Santiago Ponzinibbio hefur þurft að draga sig úr bardaga sínum gegn Kamaru Usman í maí. Ponzinibbio átti að vera aðal stjarnan í Síle og er spurning hvernig UFC ætlar að bjarga málunum.
Þeir Ponzinibbio og Usman áttu að vera í aðalbardaga kvöldsins í fyrstu heimsókn UFC til Síle. Argentínumaðurinn átti að vera aðal aðdráttaraflið á kvöldinu og sérstaklega eftir að bardagi Mauricio ‘Shogun’ Rua og Volkan Oezdemir féll niður.
Augnpotarinn umdeildi er meiddur á þumli og því er Kamaru Usman án andstæðings. Í samtali við MMA Fighting segir Usman að hann vilji einungis fá andstæðinga sem eru á topp 15 styrkleikalistanum í veltivigtinni og koma því ekki margir til greina. Demian Maia er án bardaga og þá var Alex ‘Cowboy’ Oliveira að sigra Carlos Condit um síðustu helgi. Spurning er hvort hann geti aftur hlaupið í skarðið líkt og hann gerði í Condit bardaganum.
Bardagakvöldið í Síle fer fram viku áður en bardagakvöldið í Liverpool fer fram þar sem þeir Gunnar Nelson og Neil Magny mætast í næstsíðasta bardaga kvöldsins. Blaðamaðurinn Damon Martin leggur hins vegar til að Neil Magny verði færður í aðalbardagann í Síle gegn Usman.
With Santiago Ponzinibbio injured, best possible option IMO is pulling Neil Magny from his fight with Gunnar Nelson and let him face Kamaru Usman in Chile. Do Nelson vs Alex Oliveira in Liverpool.
— Damon Martin (@DamonMartin) April 22, 2018
UFC sárlega vantar aðalbardaga kvöldsins fyrir sína fyrstu heimsókn til Síle og spurning hvort UFC fórni bardaga Gunnars til að bjarga aðalbardaganum í Síle. Það væri mikil synd fyrir okkar mann.
Þar sem bardagakvöldið fer fram í Suður-Ameríku má telja líklegt að UFC reyni að fá Suður-Ameríkumann til að koma í stað Argentínumannsins. Brassarnir Demian Maia og Oliveira eru líklegir en alls er óvíst um ástand þeirra og hvort þeir geti tekið bardagann eftir um það bil fimm vikur. Ariel Helwani segir að Oliviera sé ekki mjög spenntur fyrir því að hoppa inn.
One option discussed for Usman was Cowboy Oliveira, who won last week versus Carlos Condit, but I was told there’s resistance to the offer due to the quick turnaround. Not many available top 15 options at the moment.
— Ariel Helwani (@arielhelwani) April 22, 2018
Vonandi hefur þetta ekki nein áhrif á bardaga Gunnars gegn Neil Magny í Liverpool. Áður en Usman var bókaður gegn Ponzinibbio var Magny sagður vera andstæðingur Ponzinibbio í Síle. Svo gæti þó farið að UFC hætti við bardagakvöldið ef ekki tekst að finna andstæðing fyrir Usman.
