UFC tilkynnti rétt í þessu að meistararnir Stipe Miocic og Daniel Cormier munu mætast í sumar á UFC 226. Þá munu þeir þjálfa næstu seríu í The Ultimate Fighter.
Þungavigtarmeistarinn Stipe Miocic mun mæta léttþungavigtarmeistaranum Daniel Cormier á UFC 226 þann 7. júlí. Barist verður upp á þungavigtartitil Miocic. Þetta verður í fyrsta sinn sem tveir ríkjandi meistarar þjálfa TUF en serían verður sú 27. í röðinni en tökur hefjast í næstu viku.
Þeir Cormier og Miocic börðust báðir um síðustu helgi. Cormier varði léttþungavigtartitil sinn með sigri á Volkan Oezdemir og Stipe Miocic bætti metið yfir flestar titilvarnir í sögu þungavigtarinnar með sigri á Francis Ngannou.
Cormier hefur barist í léttþungavigt síðan árið 2014 en þar áður vann hann alla 13 bardaga sína í þungavigt. Þetta verður því hans fyrsti bardagi í þungavigt í langan tíma. Cormier getur orðið sá annar í sögu UFC til að halda beltum í tveimur þyngdarflokkum á sama tíma.
Cormier hefur hingað til ekki verið spenntur fyrir því að fara aftur upp í þungavigt. Æfingafélagi hans og vinur, Cain Velasquez, hefur alla tíð barist þar og er talið að stutt sé í endurkomu hans eftir langvarandi meiðsli. Cormier hefur þó sagt að ef hann myndi mæta Miocic myndi hann láta beltið af hendi með sigri til að standa ekki í vegi fyrir vini sínum Cain þegar hann snýr aftur.
