UFC tilkynnti fyrr í dag endurkomu sína til London. Bardagakvöldið fer fram í O2 Arena þann 27. febrúar.
Síðast þegar UFC heimsótti London barðist Gunnar Nelson við Rússann Omari Akhmedov og fór með sigur af hólmi fyrir framan 14.000 manns í mars 2014. Til stóð að UFC myndi halda annað bardagakvöld í London í febrúar/mars á þessu ári en ekkert varð úr þeim áætlunum. Bardagasamtökin munu því snúa aftur til Englands á næsta ári eftir tveggja ára hlé.
Gunnar Nelson hefur tvívegis barist í London. Fyrst gegn Jorge Santiago í febrúar 2013 og svo fyrrnefndan bardaga gegn Omari Akhmedov í fyrra. Enginn bardagi hefur verið staðfestur á bardagakvöldinu en Bretarnir Michael Bisping, Ross Pearson og Brad Pickett hafa allir lýst yfir áhuga á að berjast í London.
Miðasala hefst 4. desember en síðast varð uppselt á innan við sólarhring og má búast við svipuðum áhuga núna. Þetta verður fyrsti UFC viðburðurinn á árinu 2016.
