Á morgun fer fram bardagi Gunnars Nelson og Rick Story á bardagakvöldi hér í Svíþjóð. Bardaginn er aðalbardagi kvöldsins og fer fram í Ericsson Globe Arena.
Eins og venjan er fer vigtunin fyrir bardagana fram á föstudeginum. Vigtunin er mjög skemmtilegur viðburður og eitthvað sem bardagaaðdáendum hlakkar mikið til. Vigtunin fer fram kl 16 hér í Stokkhólmi, eða kl 14 á íslenskum tíma, og er hægt að horfa á vigtunina í beinni útsendingu á Youtube.
Sérstakir gestir á þessum viðburði eru Forrest Griffin, Joanne Calderwood (TUF 20 keppandi) og Alexander Gustafsson. Áður en vigtunin fer fram geta meðlimir UFC Fight Club fengið eiginhandaráritanir hjá gestabardagamönnum og svo tekur við Q&A (spurt og svarað) með bardagamönnunum. Vigtunin fer fram í Ericsson Globe Arena og kostar ekkert inn á viðburðinn.
