Cris Cyborg virðist hafa staðfest einn mest umtalaða kvennabardaga síðustu ára með færslu á Instagram þar sem hún birti bardagaplakatið fyrir viðureign gegn Ronda Rousey.
Samkvæmt plakatinu mun bardaginn fara fram þann 12. desember og verða sýndur á Netflix. Á plakatinu má einnig sjá merki Most Valuable Promotions (MVP) og PFL.
Bardagi milli Cyborg og Rousey hefur lengi verið einn eftirsóttasti draumabardagi kvenna í MMA. Þegar Rousey var ríkjandi meistari í UFC var Cyborg talin stærsta ógnin við veldi hennar, en bardaginn varð aldrei að veruleika á þeim tíma.
Þrátt fyrir að Cyborg hafi sjálf birt plakatið hefur enn ekki verið birt formleg fréttatilkynning frá Netflix eða Most Valuable Promotions sem staðfestir bardagann. Engu að síður hefur kynningarefninu einnig verið dreift af MMA Junkie og fleiri MMA miðlum og reikningum á samfélagsmiðlum.
Ef bardaginn verður staðfestur formlega verður um að ræða einn stærsta kvennabardaga í sögu íþróttarinnar. Báðar eru þær meðal sigursælustu bardagakvenna allra tíma og hafa aðdáendur beðið árum saman eftir því að sjá þær mætast í búrinu.
Það vakti athygli margra að sjá plakatið birtast nú, enda gaf Ronda Rousey sterklega í skyn eftir sigur sinn á Gina Carano í síðasta mánuði að hún hygðist stíga aftur til hliðar frá bardagaíþróttum. Í viðtalinu eftir bardagann sagði Rousey að fjölskyldan væri í forgangi hjá henni og að hún ætlaði að einbeita sér að næsta kafla í lífinu, þar á meðal barneignum og fjölskyldulífi. Ef bardagi gegn Cyborg verður að veruleika myndi það því marka óvænta stefnubreytingu frá þeim áformum sem hún lýsti eftir endurkomusigurinn.
