Það verða þrír titilbardagar á UFC 245 í desember. Bardagakvöldið fer fram í Las Vegas þann 14. desember og verður næstsíðasta bardagakvöld ársins.
ESPN staðfesti í síðustu viku bardaga Kamaru Usman og Colby Covington. Þetta verður fyrsta titilvörn Usman síðan hann vann titilinn af Tyron Woodley í mars.
Bardaginn hefur verið lengi í smíðum og reyndi UFC að setja bardagann saman á UFC 244 í New York en samningar náðust ekki. Bardaginn verður þess í stað í Las Vegas og verður þetta aðalbardagi kvöldsins.
Sama kvöld mætast þær Amanda Nunes og Germaine de Randamie um bantamvigtartitil kvenna. Nunes varði titilinn sinn í júlí þegar hún rotaði Holly Holm í 1. lotu.
Þá mun Max Holloway verja fjaðurvigtartitil sinn þegar hann mætir Alexander Volkanovski. Holloway varði titilinn sinn síðast í júlí þegar hann sigraði Frankie Edgar.
Það stefnir í ansi gott bardagakvöldið en auk titilbardaganna munu þeir Robbie Lawler og Santiago Ponzinibbio mætast á UFC 245.
