Fjaðurvigtarmeistarinn Alexander Volkanovski átti að mæta Brian Ortega næsta laugardag. Nú hefur Volkanovski greinst með kórónuveiruna og hefur bardaganum verið frestað.
Þetta átti að vera önnur titilvörn Volkanovski eftir tvo sigra gegn Max Holloway. Bardaginn átti að vera næstsíðasti bardagi kvöldsins á UFC 260 en Volkanovski greindist með Covid-19 í gær. Volkanovski gekkst undir þrjú Covid próf á dögunum og reyndist hann jákvæður í þriðja prófinu.
— Alex Volkanovski (@alexvolkanovski) March 21, 2021
Bardaganum verður því frestað um nokkrar vikur en óvíst er hvenær hann verður. Liðsfélagi Volkanovski, Brian Riddell, átti að berjast í gær en sá bardagi var fjarlægður af bardagakvöldinu í gær vegna Covid smits.
UFC 260 fer fram næsta laugardag en í aðalbardaga kvöldsins mætast þeir Stipe Miocic og Francis Ngannou.
