Samkvæmt áreiðanlegum heimildum MMA Frétta mun Conor McGregor koma hingað til lands í dag.
Conor McGregor kemur til með að æfa með Gunnari Nelson í Mjölni næstu vikuna. Gunnar er sem stendur að undirbúa sig fyrir erfiðan bardaga í Rotterdam í Hollandi þann 8. maí gegn Albert Tumenov.
Þó nokkrir erlendir bardagamenn hafa komið hingað til að æfa með Gunnari á undanförnum vikum. Um þessar mundir eru þeir Cathal Pendred og Philip Mulpeter hér við æfingar og mun liðsfélagi þeirra McGregor slást í för með þeim út vikuna. Gunnar heldur svo til Írlands þann 25. apríl þar sem lokaundirbúningurinn fyrir bardagann gegn Tumenov fer fram.
Sjá einnig: Cathal Pendred – Aldrei sniðugt að berjast bara fyrir peningana
Conor McGregor er auðvitað fjaðurvigtarmeistari UFC en mun mæta Nate Diaz öðru sinni í veltivigtarslag á UFC 200. Hann er ein stærsta stjarnan í UFC og hefur æft með Gunnari um árabil.
