Föstudagstopplistinn: 5 vandræðalegustu augnablikin -

Í föstudagstopplistanum að þessu sinni lítum við á atvik í bardaga sem sum mætti ýmist flokka sem grátlega fyndin eða skelfilega vandræðaleg. Þetta eru vandræðaleg atvik sem gerast í bardaga, ekki á leiðinni í hann eða í viðtali. Njótið vel.

5. Pungur!

Það er ástæða fyrir reglum sem virðast í dag kannski augljósar og óþarfar. Eitt besta dæmið er þegar Keith Hackney barðist við Joe Son á UFC 4. Hann komst í erfiða stöðu og brást við eins eins og allir myndu gera, með því að berja Son í punginn aftur og aftur. Þetta atvik var fyrst og fremst vandræðalegt fyrir áhorfandann. Þetta atvik átti sér stað í fyrstu UFC keppnunum þegar reglurnar voru mun færri en í dag.

4. Náunginn með einn boxhanska

Áður en MMA varð íþrótt var ýmislegt skrítið sem kom upp á í búrinu. Eitt það skrítnasta var í UFC 1 þegar boxarinn Art Jimmerson mætti Royce Gracie með einn boxhanska. Jimmerson taldi að þetta yrði auðveldur gróði þar sem hann var meðal fremstu boxara heims á þessum tíma. Jimmerson vildi ekki hætta á að meiða höndina sína þarna þar sem hann átti boxbardaga nokkrum vikum seinna.

3. Romero gerir í brækurnar

Í bardaga Yoel Romero og Derek Brunson tóku glöggir áhorfendur eftir dularfullum bletti á buxum Romero. Romero lét þetta ekki á sig fá og sigraði bardagann en hefur síðan alltaf neitað að saur hafi læðst í brækurnar þetta kvöld. Dæmi hver fyrir sig.

2. Mark Coleman fagnar sigri í Pride

Stundum er ánægjuvíman við sigur svo sterk að fullorðnir karlmenn breytast í smábörn og einfaldlega ráða ekki við sig. Það er eitthvað fallegt við viðbrögð Coleman en á sama tíma hræðilega misheppnað.

1. Palhares fagnar sigri of fljótt

Rousimar Palhares er alræmdur fyrir skrítna hegðun og vandræðaleg augnablik í bardaga. Það var hægt að velja úr nokkrum atvikum en það skrítnasta er þegar hann taldi sig hafa sigrað Dan Miller og fagnaði á meðan bardaginn var enn í gangi. Sjón er sögu ríkari.