Nýr veltivigtarmeistari UFC er strax kominn með augun á næsta andstæðingi. Að öllum líkindum verður það Colby Covington en Usman og Covington lentu í áflogum í gær í Las Vegas.
Kamaru Usman sigraði Tyron Woodley á laugardaginn á UFC 235. Bardaginn var mjög einhliða og vann Usman allar loturnar. Á blaðamannafundinum eftir bardagann lýsti hann yfir vilja sínum til að mæta Colby Covington næst.
„Ég get ekki verið í sama herbergi og hann. Ég bara get það ekki. Ég hlakka svo til að ná fullri heilsu og leggja hendur mínar á hann. Ég mun njóta þess að rústa honum,“ sagði Usman um Covington.
Í gær lenti þeim svo saman í spilavíti í Las Vegas. TMZ birti myndband af áflogunum sem voru minniháttar en umboðsmaður Usman, Ali Abdel-Aziz var fremstur í flokki í áflogunum.
