VBC sendi frá sér tvo keppendur á West Coast Battle 9 bardagakvöldið í Muay Thai í dag. Sigur eftir rothögg og tap eftir dómaraúrskurð er niðurstaða dagsins í Svíþjóð.
Þeir Þórður Bjarkar og Adrian Drążkiewicz kepptu á mótinu í dag en bardagarnir fóru fram undir Semi-Pro reglum en undir þeim reglum eru olnbogar og hné í haus leyfileg.
Þórður Bjarkar mætti Teo Sittirak (6-1 fyrir bardagann) frá 5-Star í Svíþjóð. Um hörku viðureign var að ræða en eftir snúnings hælspark frá Þórði í skrokkinn var Sittirak ófær um að halda áfram. Sittirak hné niður eftir sparkið og sigraði Þórður því eftir tæknilegt rothögg í 3. lotu. Glæsilegt spark frá Þórði sem smellhitti.
Adrian Drążkiewicz var að keppa sinn fyrsta bardaga undir Semi-Pro reglum og þurfti að sætta sig við tap eftir dómaraákvörðun.
