Eins og við greindum frá í gær er Conor McGregor kominn til landsins. Hann kom þó ekki einsamall heldur með heilt lið með sér.
John Kavanagh, yfirþjálfari McGregor og Gunnars Nelson, er auðvitað með í för. Hann mun dvelja hér til mánudags eða þar til McGregor, Gunnar og restin af liðinu fer til Dublin. Þar mun lokaundirbúningurinn fyrir bardagakvöldið í Rotterdam fara fram þar sem Gunnar mætir Rússanum Albert Tumenov 8. maí.
UFC bardagamaðurinn Paddy Holohan var einnig með í för en hann mætir Willie Gates á UFC bardagakvöldinu í Rotterdam. Þetta er í þriðja sinn sem Holohan kemur hingað til lands.
Bardagamenn á borð við Peter Quelly (8-2), Luka Ivana Jelcic (6-2) og Lee Hammond eru einnig með í för sem og aðrir óþekktari bardagamenn. Quelly hefur verið sagður nálægt því að komast í UFC og á bardaga á Ítalíu í maí í Venator FC. Luka Jelcic er króatískur bardagamaður og bjó um tíma hjá Diaz bræðrunum Nate og Nick. Conor McGregor er sem stendur að undirbúa sig fyrir bardaga gegn Nate Diaz á UFC 200 og ætti Jelcic því að koma að góðum notum.
Þá er sérstakur nuddari með í för sem kallaður er Dr. Pain. Nuddarinn hefur lengi fylgt McGregor og sér til þess að skokkurinn sé mjúkur og sprækur.
