94 keppendur eru skráðir til leiks á Mjölnir Open 15 í ár. Þetta er því fjölmennasta Mjölnir Open frá upphafi en mótið fer fram á laugardaginn.
Keppt er í brasilísku jiu-jitsu (BJJ) án galla (nogi) eða uppgjafarglímu og er hægt að sigra með uppgjafartökum og á stigum. Mjölnir Open er elsta BJJ mót landsins en mótið hefur verið haldið árlega frá 2006 (að undanskildu 2020 þegar Covid kom í veg fyrir mótahald). Mótið hefur verið nokkurs konar óopinbert Íslandsmeistaramót í nogi BJJ en í ár mun BJÍ halda Íslandsmeistaramót bæði í galla og án galla.
Að þessu sinni eru 94 keppendur skráðir til leiks frá 8 félögum. Mótið er fjölþjóðlegt en keppendur helgarinnar koma frá 15 löndum. Flestir af þeim eru búsettir á Íslandi og keppa fyrir íslensk félög. Keppt er í fimm þyngdarflokkum karla og þremur kvenna auk opinna flokka.
+99 kg karla
-99 kg karla
-88 kg karla
-77 kg karla
-66 kg karla
Opinn flokkur karla
+70 kg kvenna
– 70 kg kvenna
– 60 kg kvenna
Opinn flokkur kvenna
Mótið er haldið í húsakynnum Mjölnis á Flugvallarvegi 3-3A í gömlu keiluhöllinni í Öskjuhlíð. Mótið hefst kl. 11 og stendur fram eftir degi.
